Ame - Asociación de Medios Escritos en Galego

A Asociación de Medios Escritos en Galego é unha organización xurdida para coordinar a acción empresarial dos medios escritos de información xeral que se expresan en lingua galega. A xestación da Asociación de Medios Escritos en Galego, como espazo empresarial e profisional, arrinca no ano 2004 e atópase actualmente en proceso de legalización.

• Defender os intereses das empresas xornalísticas, ou grupos de empresas editoras pertencentes, mediante as actividades e funcións que conveñan para o mellor cumprimento dos obxectivos principais ou esenciais expresados na nosa Carta de Principios e para o afortalamento dos medios de comunicación que integran a Asociación.
• Contribuír ao proceso de asentamento do sector dos medios de comunicación de información xeral en galego no País, e á consolidación dun espazo comunicativo en galego, que responda ás necesidades actuais e de futuro propias da sociedade galega do século XXI, fomentando a presenza pública tanto individual como conxunta da prensa en galego.
• Contribuír á profesionalización do sector de xeito que as empresas se doten de estruturas sólidas que garantan a proxección de cada medio conseguindo a independencia económica, sostén imprescindíbel da liberdade de prensa.
• Representar ao sector diante das administracións locais, provinciais, nacionais e estatais, así como diante de todo tipo de institucións públicas e privadas, e tamén diante das institucións da Unión Europea e outras organizacións internacionais, en todo aquilo quen afecte á prensa en galego.
• Debater colectivamente os temas de interese para o sector e asesorar ás empresas xornalísticas integradas para facer fronte aos problemas profesionais comúns.
• Promover iniciativas lexislativas e administrativas que beneficien ao sector.
• Intercambiar coñecementos e información entre os membros da Asociación e a promover proxectos comúns.
• Contribuír ao proceso de normalización lingüística.

Para cumprir estes obxectivos é imprescindíbel a connivencia de tres ámbitos:

• Dunha banda, valoramos a grande importancia de contar co sector privado, na medida en que consideramos que os nosos medios son unha plataforma publicitaria cualitativamente e cuantitativamente atractivas.
• Doutra banda, agardamos o interese e implicación das Administracións públicas, que deberían de ter en conta que o feito de publicar exclusivamente en galego, neste momento, supón un importante risco empresarial, pero conleva un grande avance no aspecto da normalización da lingua e do pais.
• E, por último, desde os nosos propios medios de comunicación, na medida en que ao sermos quen de consolidar os nosos proxectos, estamos demostrando ser empresas xornalísticas competitivas e de futuro.

Poderán adherirse á Asociación as empresas editoras, ou grupos de empresas, de aqueles medios de comunicación que cumpran os seguintes requisitos:

• Que estean editados integramente en galego.
• Que estean editados en Galiza.
• Que teñan unha periodicidade non superior a dous meses.
• Que teñan unha vida mínima superior a cinco edicións.
• Que máis do 50% da súa extensión estea adicada a contidos (fronte á publicidade ou aos anuncios por palabras) e un mínimo do 25% do total sexan contidos escritos. Así mesmo deberán de superar os 28.000 caracteres (16 A4 de texto), sexa o seu soporte papel ou pantalla.
• As publicacións en soporte papel teñen que ter prezo en portada, sexa cal sexa a súa distribución.
• As publicacións asociadas deberán ser medios de comunicación profesionalizados promovidos desde a iniciativa privada, polo que non poderán formar parte os organos de expresión de administracións, partidos políticos, asociacións ou outras entidades sen ánimo de lucro.
• O ámbito temático das publicacións que forman parte da Asociación é o da información, opinión, análise e comentarios da actualidade.

A AME é unha iniciativa de cinco medios de comunicación: A Nosa Terra, A Peneira, Galicia Hoxe, Tempos Novos e Vieiros.

Para formar parte de ATE podes encher o seguinte formulario ou ben enviarnos un correo electrónico á esta dirección