Del Riego cos pais en Lourenzá. |
|
Naceu Francisco Fernández del Riego, nas súas verbas "agasallo a meus pais con algo de demoranza na noite de reis", un 7 de xaneiro do ano 1913 en Vilanova de Lourenzá. Na casa materna vive o cativo del Riego os seus primeiros anos, e nesa vila foi á escola onde seus pais lle dicían que debía "darme presa en aprender a ler e escribir", ao neno que logo lle pediría contos aos reis "en troque de xoguetes". Nas rúas vilegas de Lourenzá xogou o rapaz, nas beiras da estrada a Mondoñedo colleu amorodos "polo tempo propicio" e nas claras augas do Bao se bañou "nos días de caldelo".
Lembranza pegada na memoria deses días é o atentado que sofriu seu pai, significado persoeiro do movemento agrario da comarca, o ano 1918. Vencellado a ese suceso, os seus primeiros contactos co activismo político, na admiración por seu parente Xaquín Lozano, líder agrario coma o pai e xuíz municipal, ademais de músico, lector e bo conversador. Na casa de Lozano descubriu Del Riego a primeira máquina de escribir. |
