Última actualización: Venres 28, 6:43:44 PM Vázquez quere ser o alcalde de todos Vázquez pide o voto a nacionalistas e a xentes do PP para ser "o alcalde de todos". Joaquín Leguina, ex-presidente da Comunidade de Madrid dixo que "se eu fora de dereitas, votaría a Paco". A Vázquez non lle basta con ganar, quere arrasar. O candidato socialista por A Coruña pide o voto "ós homes e mulleres do PP e do BNG" porque é, explica, "o alcalde de todos". Leguina arremeteu tamén contra Aznar, ó que chamou "Thatcher con bigote" e "Cantinflas". Tamén dixo que "non son son galego, nin coruñés, non se pode ser perfecto" Os lendoiristas parecen estar enfadados Corre o rumor pola cidade de A Coruña de que Lendoiro e os seus seguidores máis fieis (súponse que sobre uns mil) poderían votar en branco nas eleccións do próximo día 13. O vicepresidente da Deputación, Antonio Gómez, desmentiu este feito dicindo que "no PP non hai sectores nin faccións, e que como todos eles son do PP votarán a ese partido, por suposto". Lembremos que Lendoiro foi apartado como candidato a alcalde e a presidente da Deputación. Os rumores din que a causa desto é a súa manifesta enemistade con Romay Beccaría, presidente provincial do PP. As mulleres votan pouco ó PSOE en A Coruña O PSOE é a forza menos votada polas mulleres en A Coruña. A forza máis votada polas mulleres na cidade sería o BNG, e despois o PP de Antonio Erias. Tello critica a insensibilidade co tema das drogas Henrique Tello, candidato do BNG á alcaldía, criticou a "insensibilidade" do alcalde cos problemas da drogadicción. Tamén se referiu ó tema da ubicación do novo centro de drogodependencias e abogou por unha solución "consensuada, seria e responsable". Erias promete libros de texto máis baratos Erias promete libros de texto gratis para o 80% dos escolares coruñeses. Anunciou que se chega á alcaldía, destinará unha dotación de 350 millóns de pesetas, un 1,75 % do orzamento municipal, para facilitar libros de texto "a tódolos estudiantes de ensino obrigatorio cuios ingresos familiares non superen os cinco millóns", o que beneficiaría ó 80% dos máis de 25.000 escolares coruñeses. Vázquez falou en galego O outro día Vázquez fixo unha das típicas visitas electorais ós barrios e chegou ata Palavea. Falou en galego, cousa moi pouco habitual, e dixo por tres veces "Viva A Coruña". Para pedi-lo voto dixo, textualmente, "vós sodes os que podedes dar mellor testemuña do que se fixo no barrio". Lembrou tamén que se non lle votan, vaise para outra cidade, e sinalou que foi elexido como o líder máis valorado en Vigo e Ourense. Erias promete suprimi-la ORA Unha das ofertas electorais que máis está repetindo Antonio Erias é a de suprimi-la ORA. O outro día, unha vixilante asaltoulle preocupada polo seu futuro e Erias respostou "recolocación en traballos medioambientais". Debate a tres sen Vázquez nin Erias Produciuse o primeiro debate electoral de certa altura na cidade, nas instalacións de emisora Radio Voz. Participaron Henrique Tello, Javier Losada, número 2 do PSOE, e Ernesto Pérez Barxa, número 2 do PP, e ex-concelleiro do CDS. Posible empate entre PP e BNG Nalgunha enquisa publicada a semana pasada comentábase que había a posibilidade de que os 12 concelleiros que non levaría o PSOE, estarían repartidos por igual entre o PP e o BNG, seis para cada formación. Erias segue prometendo As promesas de Antonio Erias parecen inagotables. Ás expresadas a semana anterior de suprimi-la ORA e subvenciona-los libros de texto, agora engádense vivendas por 25.000 pesetas ó mes e acceso a Internet gratuito, e asimesmo a creación de parques en Monte Alto, Vioño, Monelos, Visma e o Castrillón. Ataque ós locais de Democracia Galega Na madrugada do xoves alguén apedreou e disparou balíns contra a sede do partido Democracia Galega, que se atopa no número 48 da rúa Antonio Machado. O candidato Luis Correa acusou a "un francotirador, un profesional da manifestación, por suposto un exaltado doutro partido". Ese mesmo día, pola mañá, parte dunha cornisa desplomouse sobre un dos vehículos que Democracia Galega utiliza para propaga-las súas mensaxes. O candidato atopábase moi preto repartindo propaganda, en San Andrés. Semella unha campaña moi accidentada para este partido. Vázquez se basta, e non necesita a Touriño Vázquez califica de "contraproducente" a intromisión de Touriño na campaña. O candidato socialista por A Coruña fai máis propaganda que nunca, preocupado polas enquisas. E ademáis, proclama que non necesita o apoio de ningún secretario xeral ou, nas súas propias palabras: "o menda lerenda chega e sobra". "Nas eleccións municipais os que teñen que intervir son os candidatos" Erias promete vivendas sociais Na súa línea de promesas, Antonio Erias prometeu vivendas sociais nunha visita á Igrexa Evanxélica de Os Castros, porque "o problema dos máis desfavorecidos é o que hai que abordar en primeiro lugar". Tamén prometeu mellorar e amplia-los lugares para a celebración dos cultos. Debate radiofónico dos candidatos en Oleiros Aínda que non era do todo certo, e precisamente niso está a noticia. Na emisora Radio Voz celebrouse un debate cos candidatos dos principais partidos de Oleiros. Participaron Francisco Cerviño (PSOE), Jesús María Fernández Rosende (PP), Antón Tenreiro (BNG) e Ángel García Seoane (Alternativa dos Veciños). Éste último é o grupo ó que pertence a actual alcaldesa, Esther Pita, que se presenta á reelección. Nembargantes, o fundador do grupo e ex-alcalde, que está inhabilitado, é Ángel García Seoane "Gelo". De feito, no cartel de propaganda, aparece a fotografía de Gelo e non a de Esther Pita. Este está sendo un dos temas máis candentes da campaña en Oleiros. García Seoane está considerado como "o poder na sombra" en Oleiros. Tello apoia as cooperativas para xoves O candidato á alcaldía do BNG, Henrique Tello, promete o apoio institucional de carácter informativo, xurídico e financieiro para a creación de cooperativas por parte dos xoves. Segundo Tello, que considera tamén necesario o impulso de cursos de formación profesional para xoves desempregados, "os 100.000 millóns dos orzamentos non deben ser para a promoción e lucimento persoal dun señor chamado Paco Vázquez". Vázquez critica ós outros dous candidatos O candidato socialista á alcaldía, Francisco Vázquez, acusou ós seus rivais, Erias e Tello, de ocultarse detrás dos seus líderes, Fraga e Beiras, respectivamente. Dixo que mentres avanzou a campaña, "o BNG desapareceu e ó PP máis lle valía face-lo mesmo". O candidato socialista presumiu que "o cidadán percibiu que o alcalde pelexou o voto". Peche de campaña na cidade O PSOE pechará campaña cun mitin no Pazo de Congresos no que Francisco Vázquez será o único participante. O PP organizou un mitin-festa no Playa Club no que intervirán Antonio Couceiro, Romay Beccaría e Antonio Erias. Despois haberá un concerto de música latina. O BNG organiza unha festa lúdica con sardiñas e empanada, amenizada por un grupo de gaiteiros, no colexio Ramón de la Sagra. Erias quere ós mariñeiros na Dársena O candidato do Partido Popular á alcaldía, Antonio Erias, fixo público un manifesto de apoio ó porto coruñés, que se asenta sobre a base da "recuperación do emprego, a revitalización de iniciativas empresariais e sociolaborais ó redor da actividade portuaria e a conservación dos recursos naturais como fonte futura de riqueza". Apoiou que a pesca de baixura siga na Dársena e dixo que "hai que respeta-la tradición, o que non se contradi con outros usos do porto nin co porto exterior, senón todo o contrario". Resultado final das eleccións en A Coruña Francisco Vázquez obtivo de novo unha aplastante maioría absoluta, con 17 dos 27 concelleiros, mellorando os resultados que lle auguraban as enquisas. O PP, con Antonio Erias ó frente, baixou ata os sete concelleiros, xusto os que se supoñían, e o BNG sube de dous a tres, un ascenso menos amplio do que se esperaba. Ningún outro grupo obtivo representación. Quinta maioría consecutiva de Vázquez Será a quinta lexislatura consecutiva na alcaldía de Francisco Vázquez, conseguida sempre por maioría absoluta. O alcalde emocionouse cando lembrou que o membro número 17 da súa candidatura (en loita durante toda a noite co número 4 do BNG) era para o fillo do antigo concelleiro Esteban Lareo, que morreu en accidente de tráfico en 1996. Para Couceiro eran unhas eleccións de transición Segundo o presidente local do PP, Antonio Couceiro, "estabamos convencidos que eran unhas eleccións de transición". "Coincido plenamente con Antonio Erias en que o noso labor é traballar durante catro anos seriamente, facendo unha oposición constructiva, e irse preparando para o futuro". Na festa final non estaban nin Lendoiro nin Romay. Gran alegría de Tello Henrique Tello, candidato do BNG, sentía "felicidade pola subida modesta" do partido, "pero non a costa dos desencantados do PP, senón de aqueles que apostaron pola única alternativa, a esquerda, a progresista". Tamén estaban moi felices no BNG pola gran subida nas demáis cidades, e pola acta de eurodeputado acadada por Camilo Nogueira.