Vieiros

Vieiros de meu Perfil


MUNICIPAIS07

O Deza: as eleccións no quilómetro cero

A comarca, conformada polos municipios de Lalín, Silleda, Vila de Cruces, Rodeiro, Agolada e Dozón, conxuga a súa vocación agrogandeira cunha poxante industria téxtil e do metal.

Ramon Vilar - 09:48 15/05/2007
Dende que o ex conselleiro Xosé Cuíña tivera que abandonar a primeira liña da política galega, o alcalde de Lalín, Xosé Crespo, foi collendo con sixilo o liderado dos conservadores da comarca. Poucos dubidan que o 27-M volva lograr a maioría absoluta no municipio. Na actualidade o PP conta con 14 dos 21 concelleiros, os socialistas teñen 4 e os nacionalistas 3. Porén, os partidos da oposición están seguros de que os conservadores va deixar algún edil polo camiño.

As dúas caras da moeda
Crespo centrará unha vez máis o seu discurso no crecemento urbanístico e industrial de Lalín. O rexedor gábase a miúdo de que o municipio é o único (de quitado as urbes) que medra no interior do país. Con pouco máis de 20.000 habitantes, Crespo repite unha e outra vez que a capital da comarca pode entrar a medio prazo no grupo dos dez municipios máis poboados do país. A diferencia doutros colegas, optou intelixentemente por non enfrontarse por sistema ao novo Goberno, xogando un papel mediador dende a Fegamp. Pola contra, dosifica arteiramente as súas reivindicacións na gratuitade da autopista até Santiago (unha das máis caras de Galiza) ou a necesidade dun hospital comarcal.

Mais para a oposición o panorama é ben diferente. Nacionalistas e socialistas acusan aos populares de manter un sistema clientelar, especialmente nas parroquias máis rurais (que concentran algo máis da metade do censo) e de subordinar as necesidades diarias a proxectos máis faraónicos: nova casa consistorial ou o Lalín Arena (recinto multiusos). O potente sector téxtil (Florentino, Montoto, Toypes...) non atravesa o seu mellor momento. De feito, os sindicatos denuncian que o próspero Lalín industrial ten tamén outra cara ben menos agradábel e visíbel: a inestabilidade e a precariedade laboral. A oposición tamén acusa ao alcalde de erguer a bandeira da AP-53 e do hospital agora e de falar en voz baixa cando os seus correlixionarios estaban en San Caetano.

A sinuosa relación Cuíña-Crespo
Pola capital do Deza sobrevoaron hai meses as pantasmas dunha crise interna no PP local. As relacións entre Crespo e os cuiñistas non pasaban polo seu mellor momento. Este últimos consideraban que o rexedor non se “mollara” abondo á hora de apoiar ao de Filgueira na loita pola sucesión de Fraga. As especulacións sobre a posibilidade dunha candidatura independente auspiciada polo cuiñismo non chegaron a callar. O alcalde conseguiu integrar ao que fora o seu mentor na lista e acalar o ruxe-ruxe.

A sombra de Cuíña segue, catro anos despois, a ser incómoda para determinados sectores populares. Ninguén se atreve, e menos na súa patria pequena, a dalo por finiquitado politicamente. O 27-M vai ser o primeiro exame serio para Núñez Feijoo, uns resultados peores ca en 2003 poderían ser o mellor estimulante para o antigo barón do Deza.

Silleda e Rodeiro, as primeiras fendas
O municipio de Silleda, con algo máis de 9.000 habitantes, é o segundo en importancia na bisbarra. En 2003, o alcalde Xosé Fernández Viéitez (PP) logrou unha apretada maioría absoluta grazas ao voto emigrante (7 concelleiros PP, 3 independentes, 2 BNG, 1 PSdeG). A súa xestión é moi cuestionada debido á forte débeda que paraliza practicamente ao concello e a medidas impopulares como as abusivas taxas por consumo de auga. Aínda que lle sobran inimigos internos, a súa amizade persoal co presidente da Deputación de Pontevedra, Rafael Louzán, propicioulle unha nova oportunidade.

A dirección provincial socialista é consciente de que no municipio trasdezao é moi factíbel un cambio de goberno. Por iso, non dubidaron en fichar a unha xove arquitecta, Paula Fernández, e en integrar na lista xente da segunda forza local (CIS), organización independente que no seu momento fomentaron militantes críticos co alcalde conservador. O BNG volve confiar en Carme Fidalgo para intentar chegar á alcaldía.

Rodeiro é outro municipio onde os socialistas cren ter opcións de rachar a hexemonía da dereita. Practicamente imposíbel semella unha alternancia nos municipios de Vila de Cruces, Agolada e Dozón. Neste último concello goberna con man de ferro o peculiar Adolfo Campos. O veterano rexedor vese rodeado con facilidade de polémicas. Un exemplo é o caso dun matadoiro da súa propiedade que está no punto de mira constantemente por verter a un río ou as denuncias xudiciais da CIG por acoso laboral a unha funcionaria. O ano pasado os xornais locais fixéronse eco doutras súas múltiples “extravagancias”: o asfaltado dunha pista que conduce a un “night club” e a aprobación dun PXOM que nin viran diante os edís opositores. Sexa como for, Campos Panadeiro mantén o tipo e semella non importarlle o máis mínimo a controversia que xera a súa xestión.

Novas relacionadas

Lalín estuda un proxecto para levar internet, telefonía e televisión ás parroquias do rural

Como superar a fenda dixital nun país onde a poboación rural segue a ter un notábel peso? Esta pregunta anda tamén por Lalín. O Concello está...

Pantagruélico cocido do Conservatorio de Folque de Lalín

A Asociación do Conservatorio de Música Tradicional e Folque de Lalín celebra o Entroido por cuarto ano co magnánimo cocido Pantagruelic07. A...

Pleno ao trece: Acertan diante de notario os gañadores das oposicións municipais en Lalín

Hai case tres anos que en terras luguesas os socialistas atinaran 45 dos 46 vencedores en prazas de oposición da deputación, pero o recente caso de...

A volta

"Estes días andei bastante liado coa elaboración da lista. O certo é que é un dos momentos máis complexos para un político. Eu atópome especialmente satisfeito. Adianto neste blog que para min é unha honra que Cuiña aceptara pechar a candidatura ocupando o posto número 21", Xosé Crespo, do seu blog.

A volta

"Deixen de facer oposición ao Bloque e de ser o tonto útil de Crespo. O noso único e humilde obxectivo é facer forza para sacar a Crespo da alacaldía e pídolle ao PSOE que só sexa oposición do PP", o portavoz dos nacionalistas, Francisco Vilariño, dirixíndose aos socialistas nun pleno.

A volta

"Non malgastaremos o tempo nin os cartos dos lalinenses en obras faraónicas feitas para alimentar o ego dun alcalde megalómano e soberbio, endeusado no seu olimpo". Palabras de Manuel González Aller (PSdeG) no acto de presentación da súa candidadura diante dos veciños.

4.64/5 (11 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Resultados nas pasadas eleccións en Lalín
Resultados nas pasadas eleccións en Lalín
Crespo, entre Cuiña e Feijoo
Crespo, entre Cuiña e Feijoo
Francisco Vilariño, candidato do BNG
Francisco Vilariño, candidato do BNG
González Aller é o número un dos socialistas en Lalín
González Aller é o número un dos socialistas en Lalín