Para escoitar
esta entrevista,
preme aquí

- Eu viña notando que se celebraba, polo aniversario de Cervantes, o Día do Libro español. Entón ocorriuseme que en Galicia se podía facer, organizar ou crear unha data semellante para salientar e difundir, e prestixiar tamén en certo xeito, as letras galegas.
Entón andei á procura dunha data significativa e batín con Cantares Gallegos de Rosalía de Castro que aínda que non tiña pé de imprenta tiña dedicatoria a Fernán Caballero o 17 de maio de 1863, de maneira que se cumpría aquel ano o centenario da aparición do libro Cantares Gallegos, que foi a primeira obra de carácter universal, contemporánea, de Galicia, en galego, claro, e pareceume moi axeitada a data.
Entón, fixen un escrito que asinamos D. Manuel Gómez Román, D. Xesús Ferro Couselo e máis eu, e o presentamos á Academia Galega.
A Academia Galega aprobouno por unanimidade, transmitiu o acordo ó Ministerio de Información e Turismo, que daquela rexentaba D. Manuel Fraga, e foi declarado Día das Letras Galegas, con grande repercusión non só a nivel minoritario, senón de tipo popular, porque a figura de Rosalía era unha figura indiscutible...

- Despois, posteriormente, cada ano seguinte fóronse dando a coñecer e a divulgar a figura e a obra de moitas personalidades das letras de Galicia, ata este ano en que se lle adica a Ánxel Fole porque se han de cumprir dez anos despois do pasamento do escritor para que se lle poida dedicar o Día das Letras.