Vieiros

Translittera pretende establecer un espazo referencial de indagación en novas formas de expresión poética partindo de perspectivas creativas diferentes, tentando integrar o factor interdisciplinar que rexe o noso momento histórico e procurar un achegamento entre o público e a poesía máis aló do papel impreso e mediante a interación directa. Neste senso, Xaneiro destaca a importancia de superar con iniciativas coma esta "o desvencellamento tradicional que existe entre a arte, e a poesía en concreto, e a sociedade, que en moi contadas ocasións ten contacto coa creación poética".

Nas cinco sesións que se celebrarán ao longo destas tres semanas participarán unha vintena de creadores: Antón Lopo (escritor, xornalista e performer), Iván Prado, Carlos Santiago (actor, músico e escritor), Pepe Sendón (músico, actor e narrador), Yolanda Castaño (poeta e guionista), Rafael Xaneiro (escritor, músico e video-artista), Estevo Creus (poeta), David Creus (artista plástico e poeta), María Lado (poeta), Lucía Aldao (poeta), Manolo Cortés (actor, poeta e guionista), Cristina F. (performer, narradora e autora teatral), Lomarti Adri (artista plástico e poeta), Minus Bálido (artista gráfico e poeta visual), Ana Cibeira (poeta musical), Carlos Quiroga (poeta e narrador) e Nela Que, Roi Fernández e Ig, artistas ligados ao colectivo alg-a.

O traballo destes artistas estará centrado nunha serie de intervencións, nun espazo e tempo determinados, que xirarán en torno a dous eixes: a idea de transgresión, superación ou xogo cos límites habituais que conforman a expresión poética, e a reivindicación da poesía como acto, con maior ou menor importancia do seu carácter efémero.

A iniciativa comezará o vindeiro día 18 de novembro na Fundación Eugenio Granell, en Santiago de Compostela. O seu periplo continuará o día 25 de novembro na Fundación Luis Seoane, en A Coruña, e o día 26 na Fundación Wenceslao Fernández Flórez, en Cecebre. Xa en decembro, os encontros celebraranse o día 2 na Fundación Laxeiro, en Vigo, e clausuraranse o día 3 na Fundación Otero Pedrayo, en Trasalba. Natalia Fernández e Jaime Buján, das Fundacións Eugenio Granell e Laxeiro respectivamente, destacan a importancia de que as casas e fundacións de artistas colaboren en iniciativas conxuntas coma esta e salientan o seu valor experimental, coherente coas liñas de traballo das súas entidades.

Todas as sesións, que comezarán ás 19:00 horas serán de entrada libre para todos aqueles que desexan asistir e participar desta iniciativa.