"Non teño consciencia de terlle faltado ao respecto; e de ser así, non teño ningún reparo en pedirlle desculpas". Nunha comparecencia ante a prensa, "para porlle voz ao comunicado da Executiva", o portavoz nacional do BNG, Anxo Quintana evitou criticar a decisión de Beiras de demitir como presidente do Consello Nacional e procurou transmitir, segundo dixo, "unha mensaxe de normalidade e tranquilidade á militancia e á sociedade". Preguntado sobre o posto que ocupará Beiras a partir de agora, Quintana respondeu que "ocupe o posto que ocupe, Beiras non é un militante calquera. Sempre terá un posto destacado no BNG e contaremos con el". Para Quintana, "nada distrae" neste momento o obxectivo do Bloque "centrado en conseguir un cambio galego nas próximas eleccións".