Vieiros

Acusada dende a oposición de ser unha campaña de propaganda, na súa comparecencia fronte á Comisión de Administración Xeral, Xustiza e Interior, o secretario xeral da consellería de Emigración, Antonio Díaz Otero, explicou que o gasto se distribuirá en dúas campañas de "sensibilización" sobre emigración, retorno e inmigración. A meta principal sería segundo a consellería "incidir sobre os axentes sociais e empresariais e especialmente entre os máis novos para axudar á recuperación da memoria histórica sobre o fenómeno migratorio en Galiza. Segundo Otero, "os medios non sempre dan unha visión positiva da emigración e dos retornados" polo que sería "responsabilidade do goberno galego tentar mellorar iso".

Lembrámoslles que un informe recente da CIG, a partir de datos do Instituto Galego de Estatística, advertía que máis de 175 mil galegos marcharon fora de Galiza entre os anos 1990 e 2004 na procura de mellores condicións laborais. A maiores, o informe subliña que eses datos recollen só os emigrados que decidiron empadroarse no lugar de destino, polo que as cifras reais dos que marcharon neste tempo estarían moi por riba.