Vieiros

As propias investigacións da empresa e as das autoridades xudiciais non son abondo, segundo os sindicatos, fronte á gravidade do acontecido, e por iso unen a súa voz para solicitar unha auditoría que de xeito independente avalíe o acontecido. Ao tempo, acordan un paro este venres dende as 11h30 e unha concentración diante do Concello ás 12h.

Dende CCOO lembran que Navantia, "coma todas as principais empresas da construcción e reparación do naval en Galiza, subcontratan unha parte moi importante dos traballos e con iso externalizan os riscos". Segundo o sindicato, o persoal das empresas contratadas, ademais moitas veces con contratos precarios, "convértese no elo máis feble da cadea de produción, ao aceptar condicións de traballo que o persoal fixo pode rexeitar". Comisións denuncia tamén que as empresas subcontratadas "alén do cumprimento formal, non teñen debidamente incorporada a prevención de riscos nas súas actividades".

Por outro lado, o sindicato é especialmente crítico coa "ineficacia, por insuficiencia de medios e recursos humanos, da actuación inspectora tanto da Xunta de Galiza como da Inspección de Traballo, e a conivencia da Xunta coas malas prácticas de moitos dos servizos de prevención alleos que asesoran unha gran parte das empresas".

Dende a CIG insisten en que se actúe "con dilixencia" e ao respecto, o seu secretario xeral, Suso Seixo, advertiu que "estamos afeitos a que a fiscalía actúe contra os traballadores, con toda dureza, pero logo en conflitos destas características, onde hai mortos por medio, normalmente se procede con bastante benevolencia cos empresarios".