Vieiros

Seixo destacou no seu discurso a necesidade dun "novo marco político para Galiza " e asegurou ser imprescindíbel "a reivindicación de maior soberanía para o noso país como forma de garantir un desenvolvemento económico e social que sexa real e autocentrado". Logo de ser escollido outra vez para ocupar a secretaría xeral da CIG, repasou as dificultades que enfronta o sindicalismo "nun escenario sociolaboral marcado polo desemprego, a emigración, a precariedade, os altos índices de sinistralidade laboral, o recorte das prestacións sociais e do poder adquisitivo dos salarios, a deterioración e privatización dos servizos públicos, os intentos de reforzar o marco estatal de relacións laborais, así como un escenario de desencontro entre o modelo sindical da CIG e o do sindicalismo estatal".

Ao respecto pronunciouse a favor dun escenario posterior ás eleccións do 19de xuño onde "o peso e a política do futuro goberno galego estivera dirixida polo nacionalismo, se queremos ter garantía de que se van pór nun primeiro plano e que se lle vai intentar buscar solución, aos problemas reais que ten Galiza".

No seu discurso, destacou tamén a creación da caixa de resistencia, cunha dotación inicial de 360 mil euros, destinada a compensar economicamente as perdas salariais dos traballadores en folga.