Vieiros

A nova web, creada pola empresa Acordar, supón un importante avance nas relacións da administración municipal cos cidadáns. Neste senso, a intención do goberno municipal pasa por poñer servizos administrativos a disposición dos usuarios de internet, seguindo os criterios de calidade, rigorosidade e inmediatez. Destacan neste eido a publicación da normativa e as xestións municipais, así como da cartografía do PXOM que pode consultarse en liña atendendo aos criterios de interese dos usuarios. Carballo súmase así aos avances da administración electrónica.

Na actualización da nova web municipal intervirá o persoal do Concello, cualificado e iniciado no manexo das novas tecnoloxías. Así, optimizaranse os recursos municipais e implementaranse os servizos destinados a mellorar a calidade de vida dos veciños a través da rede.

Esta páxina cumplirá un triple servizo informativo. Os seus contidos cubrirán a demanda dos profesionais da información, as asociacións do municipio e os cidadáns de Carballo. Estes últimos poderán coñecer en todo momento as novas do seu interese, os avisos, as convocatorias e mesmo a axenda de actos programados no Concello. Os usuarios que así o desexen poderán, asemade, subscribirse a estas informacións para recibilas puntualmente a través do seu correo electrónico.

O rico tecido asociativo de Carballo conta cun espazo de seu nesta nova web, co que se fomenta a creación dunha comunidade en rede. Cada unha das entidades do Concello –culturais, deportivas, veciñais...- disporá dunha páxina dende a que difundir o seu labor, mediante a publicación das súas propias novas.