Vieiros

A conselleira de Pesca, Carmen Gallego, expresaba así este luns a súa "condena absoluta" diante de calquera tipo de práctica pesqueira ilegal, subliñando o compromiso do novo goberno "coa protección dos recursos mariños" e a prol da "pesca responsábel". A consellaría amosa así a súa posición diante das primeiras informacións sobre a inspección dos dous buques galegos que confirmarían a pesca ilegal de grandes cantidades de fletán azul por parte do Garoya e o Monte Meixoeiro.

A secretaría xeral de Pesca, dependente do ministerio de Pesca, esixiulle formalmente a Noruega que libere de xeito inmediato os buques para que o procedemento que puidera derivarse do presunto delicto se desenvolva no Estado español. De probarse a falta cometida, o proceso contra os barcos incluiría non só unha elevada multa, senón tamén a suspensión da licencia para a actividade pesqueira. Ao tempo, o goberno central solicitoulle á Unión Europea que emprenda as accións necesarias para defender os intereses dos buques galegos na zona. O goberno español levará a súa demanda ao Tribunal da Haia se non se poñen en liberdade os barcos galegos.