Vieiros

Dos 203 comités olímpicos recoñecidos polo COI, o 40% acudirán a Turín. Desde Salt Lake City, onde participaron 77 comités olímpicos nacionais, aumentaron tres máis, e dous deles é a primeira vez que participan nunhas Olimpíadas de Inverno, Madagascar e Etiopía. O malgaxe Mathieu Razanakolona estará na lista de saída do eslalon e do xigante e o etíope Robel Teklemariam aproveitará a viaxe para participar en catro probas de esquí de fondo (15 km., 30 km., 50 km. e esprín) e ademais en saltos. Razanakolona, que naceu e viviu sempre en Canadá, creou a Federación Malgaxe de Esquí para cumprir este soño, que non queda aí: está a levar a cabo un programa de desenvolvemento para a súa illa de orixe aproveitando a repercusión da súa estadía en Turín. E se queredes apoiar a iniciativa podedes ata mercar camisolas de Ski Madagascar pola rede.

O etíope Teklemariam, que vive en Nova York dende os nove anos, terá lonxe converterse no primeiro campión olímpico da África Negra, pero lembremos que foi na capital italiana onde o tamén etíope Abebe Bikila conseguía ese reto pro primeira vez nos Xogos de verán 1960.

O presidente do COI, o belga Jacques Rogge, declarou sentirse orgulloso deste récord de participación dos comités olímpicos nacionais. "Esta cifra demostra que o traballo do COI, dos comités nacionais e das federacións internacionais no eido dos deportes de inverno está a dar os seus froitos e que o interese polos Xogos de inverno medra de máis en máis". A taxa de participación feminina é tamén maior ca nunca. En Turín haberá 37 probas para mulleres e 47 para homes e en todos os sete deportes do programa haberá cando menos un evento desputado por deportistas mulleres.