Vieiros

Deste xeito, e cunha emenda no mesmo sentido presentada polo grupo parlamentario do BNG, a Lei de Dereito Civil que a Cámara galega debaterá nas próximas semanas, vai corrixir o défice na atención aos dereitos das parellas de feito en Galiza, onde a diferencia da maioría de comunidades autónomas, aínda non existían normativas ao respecto. O voceiro do PPdeG anunciou que apoiarán que se lle dea "seguridade xurídica" a estas persoas, creando un rexistro de parellas e garantíndolle dereitos similares aos dun matrimonio tradicional. De xeito significativo, a emenda dos populares recoñece explicitamente unha parella de feito como a unión de dúas persoas maiores de idade "que se atopen vencelladas por unha relación afectivo sexual" subliñando "sexan do mesmo ou de distinto sexo".

Lembrámoslles que a postura oficial do PPdeG nos últimos anos sobre este asunto tivo significativos episodios protagonizados polo propio ex presidente da Xunta e líder do partido, Manuel Fraga, quen sempre se declarou contrario a avanzar nese camiño. Unha das súas máis lembradas declaracións ao respecto produciuse hai un par de anos, cando ao fío da actualidade do alcalde de Toques, condenado por delicto de abuso sexual sobre unha rapaza de 16 anos sen o seu consentimento, Manuel Fraga declaraba: "Avergónzame a hipocrisía de moita xente nestes tempos perelectorais. Eses grupos defenderon o aborto sen condicións, o amor libre ou as parellas de feito, incluso entre persoas do mesmo sexo, e agora pídenme que me apiade da pobre nena. Foi unha conduta incorrecta, non unha violación ou un acto de pederastia".