Vieiros

O Movemento Cultural Xandoque, en Ourense, ou a Burla Negra, celebraron algún ano, con viño, churrasco, contos e outras herbas, o Primeiro de Abril, un día do que Otero Pedrayo daba conta na súa Historia de Galiza, referíndose a el coma o día das trampas e da broma. Así e todo a tradición, de orixe incerta, vai quedando perdida na memoria dos máis vellos, en beneficio do coñecido 28 de Decembro, Día dos Santos Inocentes.

Dalgún xeito, o día galego das chanzas pérdese na historia co vencello á tradición que hoxe manteñen as culturas anglosaxona ou francesa, que se refiren a esta data coma o April Fool's Day e o Poisson d'Avril. E seica na illa balear de Menorca teñen tamén o Día D'Enganar.

Na web hai explicacións varias sobre o asunto. Unha delas cóntanos que ten que ver co momento no que o rei Carlos IX introduciu en Francia o novo calendario, que mudou as datas de xeito que o Aninovo pasaba a caer no 1 de abril. O lento camiño da información por aqueles tempos fixo que moita xente seguise celebrando o primeiro do ano o 1 de abril, que polo calendario novo pasaba a ser o 1 de xaneiro.