Vieiros

"Alégrame moitísimo a intención do goberno de duplicar o investimento no campo da innovación", destacou Danuta Hübner, quen dixo ver "entusiasmo" e "vontade de traballar" no executivo e tamén boa vontade por parte do empresariado en implicárense nese desafío. Ao tempo amosou a súa satisfacción por ver no plan do goberno galego "a necesidade de traballar con velocidade para obter resultados canto antes".

A comisaria subliñou o "importante cambio de estratexia" cara o futuro que se está a desenvolver en Galiza e fixo destaque do protagonismo das 254 rexións europeas a prol dunha Europa "máis competitiva no mundo global sen contribuír dende cada rexión". Hübner saiu satisfeita da súa xuntanza cos representantes das diversas consellarías galegas, gabando que os obxetivos estratéxicos que lle presentaron coinciden coa propia estratexia da Comisión Europea.

Por outro lado, o presidente da Xunta comentou na súa intervención que "no período 2000-2006 do conxunto dos fondos foi dedicado a infraestruturas tecnolóxicas un 0.6%, a tecnoloxía, innovación e sociedade da información o 2.8% e a capital natural e patrimonio e valorización dos recursos naturais menos do 7%, obxetivos todos que o novo goberno considera agora prioritarios. Touriño subliñou especialmente a promesa de incrementar o actual investimento en I+D, do 0.8%, até o 1.5%. "A comunidade galega precisa a plena incorporación á sociedade do coñecemento", indicou.

Así e cara ao reto da converxencia no período 2007-2013, o presidente da Xunta asegurou que en xullo haberá un plan para definir a nova estratexia "en colaboración coa propia comisaria" coa meta de que sexa aprobado e incorporado na axenda da Unión Europea a finais deste ano.