Vieiros

"Responden a unha organización territorial que vén do século XIX e que de xeito progresivo vai cambiando", reflexionou Xosé Luís Méndez Romeu, agoirando que se ben a curto prazo as deputacións seguirán existindo aínda que reformulándose as súas funcións, o seu futuro é máis incerto. O conselleiro de Presidencia destacou que a intención do goberno é virar o funcionamento destas institucións de xeito que "cooperen cos concellos co seu financiamento e ingresos fiscais e non con axudas discrecionais". "É un clamor en Galiza que as deputacións non poden seguir ancoradas no pasado", comentou Romeu, quen agarda que nese sentido as reformas conten co consenso político necesario.

O conselleiro tamén se pronunciou sobre as áreas metropolitanas, opinando que "non deben ter sentido político pois duplicarían o labor que fan os concellos ou as deputacións polo que deben evolucionar cara a estruturas que presten servizo nun entorno metropolitano de xeito funcional sen un gran aparato político ou administrativo salvo que alguén estea a pensar en aumentar os impostos". Nesa liña referiuse ao caso de Vigo, polémico en datas recentes, avanzando que logo de retirar a proposta inicial, Presidencia vai recuperar o debate "no momento oportuno" e que no marco desa reforma esperan que se faga por consenso.