Vieiros

A Consellaría de Medio Rural porá en marcha desde o próximo 1 de xullo e ata o 31 de setembro a campaña de extinción de incendios deste verán. En total, 2486 axentes forestais, 28 medios aéreos e unha unidade de elite para combater incendios de alto risco. Actualmente, 1.400 axentes xa están en activo, a estes haberá que sumarlles os máis de 1.000 axentes contratados para o verán. O número de medios aéreos incrementarase en 20, deste xeito contarase con 14 helicópteros e 14 avións. Porén, Medio Rural recoñeceu que para a campaña deste verán se reduciu o número de helicópteros de coordinación, xa que este 2006 esta a ser "menos complicado" que o 2005 debido ás condicións meteorolóxicas.

Respecto a anos anteriores, a principal novidade está na creación dunha unidade de elite, integrada por 42 persoas, que terán a misión de extinguir os incendios de alto risco que se produzan en Galiza. Este grupo, que terá a súa base de operacións no sur da provincia de Ourense, creouse logo de que o ano pasado os servizos de extinción de incendios tiveran que facer fronte a 51 incendios de máxima alerta, incendios nos que estiveron en risco vidas humanas, inmobles ou instalación como redes eléctricas ou depósitos de auga. É por iso, polo que Medio Rural creou un grupo especializado para actuar en este tipo de incendios estando capacitados parar levar a cabo operación de rescate e actuar en condicións perigosas.

Outra das novidades é a instalación de cámaras termográicas cun radio de actuación de 300 quilómetros cadrados. Estas cámaras son capaces de detectar un incendio dun metro cadrado a unha distancia de 10 quilómetros.

Ata o momento, o sistema co que se traballaba non permitía que a Dirección Xeral de Montes coñecese a existencia dun incendio ao mesmo tempo que os axentes forestais. Así, unha novidade máis deste ano será que os axentes forestais e policiais contarán cun sistema informático para ter información sobre os focos en "tempo real".

O número de parroquias galegas que contarán cunha especial vixilancia nesta materia reducirase a máis da metade. Deste xeito, se ata agora eran 525 as parroquias que contaban cunha maior dotación de axentes forestais e de vixilancia policial, este ano serán 256 en total. Medio Rural xustifica esta redución en que "se trata de optimizar e racionalizar os recursos, xa que só o 11% do territorio galego rexistra o 40% dos incendios".