Vieiros

"As xentes do Morrazo merecemos unha festa, despois de oito anos de reclamacións". Así de claro o teñen os membros da Plataforma cidadá antipeaxe, os cales non se esquecen tampouco do colaboración dos veciños de Vigo, Chapela, Vilaboa ou Pontevedra, "que sempre viñeron a participar nas marchas a pé camiñando entre Moaña e a Ponte de Rande convertendo aquelas manifestacións en históricas".

Así, o próximo sábado, o paseo marítimo de Moaña será o escenario dunha gran festa na que a música e o humor serán os protagonistas. No acto farase entrega de cen galardóns, "pontes de Rande" elaboradas por Sargadelos, a todas aquelas persoas e institucións que loitaron pola supresión da peaxe. Tamén haberá tempo para a proxección dos momentos máis importantes destes oito anos de protestas. Pechará a festa o gaiteiro moañés Xosé Manuel Budiño quen compartirá escenario con diferentes artistas vinculados á loita antipeaxe.