Vieiros

Iniciados en zonas de acceso especialmente difícil pero que facilitan a expansión do lume, ubicadas preto de zonas urbanas e con intención de poñer en risco vidas humanas... O ministro de Interior referiuse a varios dos factores apuntados polos expertos para explicar a "nova tipoloxía de incendios" maioritaria durante este verán.

Alfredo Pérez Rubalcaba falou de incendios "moi planificados e pensados provocados por incendiarios que revelan un grao de preparación moi chamativo". "Quen os inicia sabe onde facelos e como facer máis dano", avisou o ministro. "Non só estamos combatendo o lume, senón a desalmados que lle prenden lume ao monte", insistiu. O ministro referiuse ás vinte detencións realizadas pola Garda Civil e a Policía, alén dos incendiarios presos pola Policñia Autonómica, e reiterou que nos traballos dos axentes das unidades especiais despregadas no monte está sendo fundamental a colaboración cidadá.

Doutra beira, o presidente da Xunta, Emilio Pérez Touriño, quixo destacar o aumento da efectividade nas tarefas de extinción, apuntando que "nos últimos tres días esta capacidade pasou de situarse entorno ao 50% a acadar o actual 70-75%" e explicou que "o obxectivo é seguir mantendo a seguridade das persoas e as vivendas e ir apagando máis lumes". Por outra paret, chamou á responsabilidade das forzas políticas e pediu "deixar de lado polémicas que non conducen a nada porque Galiza necesita conxuntar esforzos e vontades máis que nunca".