Vieiros

"Nós traballamos todos os días nas aulas e sabemos cales son os verdadeiros problemas dos alumnos cos ordenadores", indica Teo Ramírez, fundador de Galinux. Ramírez explica que algúns rapaces, no lugar de atender as explicacións, prefiren fedellar no computador, o que pode causar danos graves no equipo. Para evitalo, Galinux impide aos rapaces modificar arquivos no disco duro.

Trátase dunha distribución moi "lixeira" e "rápida" para maximizar o tempo das clases, algo que lles preocupaba aos mestres programadores. Ademais, consome poucos recursos, polo que é adecuado para os computadores "antigos" de moitas aulas de informática. Cómpre lembrar que case o 60% dos ordenadores nos centros de ensino medio en Galiza son inferiores a un Pentium IV, segundo datos recollidos no Plano Estratéxico Galego da Sociedade da Información .

Polo de agora, Galinux está a dar os seus primeiros pasos e non conta con ningún apoio institucional. Tras lanzar a versión 1.2., os seus creadores traballan agora na adaptación de software libre para o ensino a este sistema.

Os once profesores que crearon Galinux proceden maioritariamente de Ferrol, aínda que tamén hai membros de Narón e Vigo. Curiosamente, entre eles non hai ningún profesor de informática, pero si de filosofía e tecnoloxía.