Vieiros

Segundo Amigos da Terra, "foi e está sendo moi frecuente que os Concellos concedan licencias de instalación para estas actividades de postes de emisión de ondas electromagnéticas, como se fosen inocuas e, por tanto, á marxe do procedemento establecido no Regulamento de Actividades Molestas, simplemente polo feito de que tal actividade non figura no nomenclátor anexo de actividades clasificadas, amparándose tan só na lexislación do solo e non dando audiencia aos máis inmediatos ao contorno". A xurisprudencia do Tribunal Supremo avala a tese de que o devandito Regulamento é tamén aplicábel ás antenas de telefonía móbil.

O Regulamento establece a necesidade de efectuar, "unha vez que se instale a torre de telefonía", "unha inspección previa ao inicio da actividade, na que se debe comprobar o correcto funcionamento da maquinaria industrial ou aparellos, e na que se acredite a existencia das medidas técnicas que impidan que se produzan molestias a terceiros ou lindeiros, o que non ocorre nunca porque case que a totalidade dos Concellos non dispoñen de medios persoais e técnicos suficientes para estudiaren e valoraren estes aspectos de funcionamento". Nos casos investigados por Amigos da Terra ficou comprobado a ausencia de inspección previas. "A administración local desenténdese e agarda para actuar ás denuncias dos cidadáns."

"Cando se producen estas denuncias, que se tramitaron dende a nosa asociación, os Concellos instan á empresa instaladora a que legalice a actividade ou adopte medidas correctoras que nunca se sinalan nesa actividade de control", afirma Amigos da Terra.

"Dos dous únicos Concellos da xeografía ourensá que adoptaron unha normativa para regular a instalación das torres de telefonía móbil (Cartelle e San Amaro), o concello de Cartelle viu recorrida diante do Tribunal Superior de Xustiza de Galicia a súa ordenanza pola empresa Telefónica Móbiles S.A. Outros varios Concellos teñen tamén recorridas diante dos xulgados as ordes de paralisación das obras de instalación de estacións-base (Ourense, O Carballiño, Paradela). O dictame dos xulgados xa tivo uns efectos prácticos no caso concreto do concello de Ourense, no que se dictaminou a anulación da orde de paralisación a causa da indefensión xenerada para os particulares."