Vieiros

Ademais dos bancos de percebes e da fauna e flora asociada ás costas rochosas, alcas, gaivotas e fulmares son as primeiras aves localizadas nas costas afectadas polo verquido. Tamén está a prexudicar os bancos marisqueiros das praias da zona.

Segundo declaracións de compañeiros do grupo ecoloxista PX, que formaron grupos de vixilancia pola Costa da Morte, as barreiras de contención tivéronse que retirar a última hora da mañá polo mal estado da mar (calcúlase unha forza 8), para tentar instalalas de novo a primeira hora da tarde).

Os membros destes grupos están recibindo as queixas dos mariñeiros da zona, posto que se está a priorizar a protección das zonas privadas de marisqueo, esquecéndose dos bancos naturais.

A Federación Ecoloxista Galega (FEG) lembra que estamos a falar dunha zona que está incluida na proposta da Xunta e do Estado Español de espacios susceptíbeis de formaren parte da Rede Natura 2000, a futura rede europea de espacios protexidos. Trátase polo tanto, dunha zona declarada como LIC (Lugar de Interese Comunitario).