Vieiros

A Consellería de Pesca promete indemnizacións inmediatas para as confradías coruñesas afectadas polo desastre do petroleiro Prestige. Esta rapidez choca coa lenta burocracia do caso Mar Egeo, o último precedente de marea negra na Costa da Morte.

Segundo informou o presidente da Federación Coruñesa de Confradías, Evaristo Lareo, os afectados polo verquido do Mar Egeo continúan sen cobrar as indemnizacións dez anos despois. ‘Polo visto xa está todo asinado e listo pero falta que o Estado nos ingrese os cartos’, di.

As confradías prexudicadas polo novo desastre ecolóxico son case as mesmas que sufriron a marea negra do 92. Malpica, Callón, Corcubión, Camelle... ‘pero esta vez a mancha é máis grande’, explica Evaristo Lareo, polo que haberá aínda máis afectados.

A Federación Coruñesa de Confradías amósase convencida, sen embargo, de que esta vez recibirán as axudas desde agora mesmo. ‘A Consellería prometeunos que cobrariamos as indemnizacións xa’, afirma, e fala dunha cantidade de 150.000 pesetas mensuais para cada mariñeiro.

Aínda que Evaristo Lareo non se queixa, recoñece que a indemnización que van percibir é moi inferior á cantidade que podería gañar un percebeiro na época do Nadal.