Vieiros

Montero Vaz esgrimiu razóns de conveniencia política para o conxunto da organización socialista en toda Galicia o feito da súa demisión. "Con Emilio Pérez Touriño úneme unha relación cordial e de amizade, pero hai que dicir que puxemos as cousas moi difíciles e el non podía asumir protagonismo nunha crise como esta sen levantar ampolas", sinalou o xa ex candidato á Alcaldía de Pontevedra. A executiva galega do PSOE emitiu unha pequena nota de prensa na que confirma que Antón Louro Goyanes será o presidente da xestora que sustitúe á executiva local do partido en Pontevera. Louro estará acompañado nesta difícil tarefa por José Luis Coladas, ex presidente da Federación de Asociacións de Pais de Alumnos; Andrés Vilán, director do instituto de bacharelato `Valle-Inclán'; María Xesús Arrate Varela, deputada no Congreso e o concellal de Poio, Pedro Soto, na súa condición de coordenador comarcal. A crise no PSOE local levaba larvada desde hai tempo polo enfrontamento que mantiñan desde sempre o secretario xeral local, Baltasar García, e o candidato á Alcaldía, Montero Vaz, ámbolos dous demitidos agora dos seus cargos. O PSOE local queda prácticamente orfo a tres meses das eleccións municipais o que pode producir que o electorado de esquerdas e progresista se decante finalmente polo BNG, opción á que as enquisas lle dan gañador (posiblemente con maioría absoluta) en Pontevedra capital.