Vieiros

A Sociedad General de Autores reclamou ós organizadores do festival celebrado no pavillón do Berbés en Vigo o 25 de xaneiro o 10% da súa recadación. Este feito débese a que un dos sete grupos colaboradores é membro da devandita asociación e aínda que a representante de Boikot dixera que o grupo cedera tódolos seus dereitos e malia tratarse dun concerto benéfico a sociedade segue a esixi-lo pagamento dese dez por cento.
Alberto Gil, do grupo Erva, considera que non deben reclamar ese 10% pois os demais grupos que participaron no «Chapapote Rock», entre os que estaban MCD, Skacha, Soak ou Viñalar Fantastic Band, non estaban inscritos na SGAE, polo tanto a comisión non debería ser do 10% do total. Ademais os ecoloxistas amosaron a súa sorpresa ante este comportamento tan insolidario pois a finalidade do concerto non era outra que recadar fondos que permitan seguir loitando contra as consecuencias derivadas do afundimento do «Prestige».
Nos próximos días a organización negociará coa sociedade o pagamento esixido.