Vieiros

O Celta de Vigo non deu a talla doutras ocasións, aínda que finalmente o resultado non sexa malo: deixa abertas tódalas posibilidades. Mentres, o Olympique de Marsella tivo máis oportunidades pero non dominou o encontro.

Na primeira metade o conxunto francés tivo máis oportunidades, mais o Celta non desmereceu en xogo. Dutruel salvou unha ocasión clarísima de Blanc, pero logo o gol chegou nun erro de Djorovic que aproveitou Maurice e os xogadores fóronse ao descanso cun 1-0 no marcador.

Na segunda parte o Celta reaxiu e comezou a tirar a porta. Deixaron o medo nos vestiarios e empeñouse en xogar o seu partido. A primeira ocasión clarísima foi para Oscar Vales, que estrellou o balón no poste dereito de Porato. O Celta dominaba e o resultado chegou finalmente: un centro raso de Revivo, con erro de Porato, foi aproveitado por Mostovoi para empatar o encontro.

Sen embargo, tres minutos depois, Maurice marcou de novo desdebuxando o xogo que estaba a facer o Celta. A partir de aí, os vigueses conformáronse co resultado e adicáronse a controlar ao rival. Finalmente, un 2-1 no marcador que deixou felices a todos. A eliminatoria está aberta e Balaídos decidirá quen chega a semifinais da Copa da UEFA.