Vieiros

Cita consolidada na pelegrinaxe folqui do verán galego e oficialmente declarado evento de interese turístico nacional, o Festival de Ortigueira celebra o 25 aniversario do seu nacemento. Abre a orquestra folc SonDeSeu, nun venres que trae ademais as actuacións dos irlandeses Altan, os húngaros Muzsikás e Marta Sebestyén e a gaita electrónica do asturiano Hevia. A cita forte do sábado chega con Hedningarna, os ‘pagáns’ suecos, que presentan disco recopilatorio. Ademais, Budiño, Shooglenifty e Bal Tribal. Para o domingo, os galegos Faltriqueira, os andaluces Rare Folk, os rumanos Fanfarria Çiocarlia e o folc rock dos escoceses Wolfstone. E non remata aquí, lembrámoslles que para o 26 de xullo, hai o gran concerto aniversario coa actuación dos míticos Chieftains, xunto a Carlos Núñez.