Vieiros

"Esta noite e coa decisión dos cidadáns restauramos a independencia de Montenegro". Afirmouno a última hora do domingo Milo Xucánovich, primeiro ministro montenegrino, subliñando a vitoria do "si" no referendo sobre a autodeterminación celebrado na ex república iugoslava para decidir sobre o seu futuro á beira de Serbia. O primeiro ministro aludiu daquela a datos non oficiais segundo os cales os votos a prol da independencia de Montenegro chegaron ao 55.5% do total, nunhas eleccións onde a participación foi masiva, por riba do 86%, superando amplamente os mínimos impostos pola Unión Europea para recoñecer o novo Estado, aínda que apenas catro décimas por riba do mínimo requirido para o "si".

A votación á que estaban chamados case medio millón de montenegrinos dálle beizón á apertura oficial do proceso para a conformación do país como novo Estado. Centos de veciños da capital, Podgóritsa, celebraban xa a independencia na noite do domingo. Os grupos partidarios de que Montenegro permanecese unida a Serbia non recoñeceron aínda publicamente a derrota, malia que os colexios electorais pendentes de reconto non poderán mudar apenas o reparto final.

• Os montenegrinos deciden este domingo nun referendo sobre o seu futuro como estado propio
• Os vascos ollan para Montenegro
• Montenegro busca a independencia para a "estabilidade"