Vieiros

O 'Plan Estratéxico para a Prevención de Riscos Laborais 2006-2010', refírese a tres eixos de actuación: redución de accidentes laborais, así como das enfermidades de orixe laboral; a mellora das condicións de seguridade e saúde no traballo e a asunción desas melloras por parte dos empresarios e traballadores; e a superación das dificultades que se derivan da realidade estrutural das empresas galegas e dos seus traballadores "que polas súas características (medianas e microempresas) fan necesario reforzar os mecanismos de información e asesoramento na materia de prevención de riscos laborais)".

Entre os obxectivos concretos a desenvolver a través de actuacións e programas específicos: A consideración nos contratos da administración daqueles casos nos que se cometesen delitos ou infraccións administrativas moi graves en materia de seguridade e saúde laboral; campañas de sensibilización, xenéricas e específicas, sobre os accidentes, as secuelas e os seus custos, entre empresas e os traballadores e desde o propio sistema educativo; creación do Instituto Galego de Seguridade e Saúde Laboral; aprobación dunha normativa legal específica; creación dun observatorio de estudo da accidentabilidade e de condicións de traballo; elaboración dun programa de información sobre vixilancia epidemiolóxica da saúde laboral; programa de análise, estudo e asesoramento de riscos específicos vencellados ás enfermidades profesionais, incluíndo axentes químicos, ruído, vibracións, movementos repetitivos, sobreesforzos, trastornos músculo-esqueléticos en xeral, acoso moral, síndrome do queimado, violencia no traballo, etc.