Vieiros

É a primeira vez que o Liet Internacional se fai fóra de Frisia, onde se comezou a facer no ano 2002. A organización correrá a cargo das minorías finlandesa e lapoa de Suecia, e estará apoiado economicamente polo concello de Östersund, a provincia de Jämtland e o parlamento lapón de Suecia. Na nova ubicación do festival tamén influíu que os lapóns resultaron vencedores nas dúas últimas edicións.

Pero o festival está aberto a facerse noutros lugares de Europa, e mesmo a implicar a máis dunha cidade na mesma edición, pois contémplase a idea de organizar fases sectoriais ao longo do continentente. A nosa consellaría de Cultura interesouse pola posibilidade de que Galiza poida ser sé do Liet nalgunha das vindeiras edicións, se ben está descartado que sexa o ano que vén.

Como seguir o festival na rede?
A canción coa que participará Narf titúlase Santiago e pódese escoitar aquí. Tamén se poderá seguir en directo o certame o domingo pola tarde a través da web da radio pública sueca. Aínda que hai un xurado o festival admite por primeira vez votación por internet e por SMS, aínda que este sistema só o poderán empregar os que vivan en territorio sueco. O resto de Europa poderá facelo a través desta web, pero só cando se abran as votacións, das oito e media ás nove da noite. Así que todos a apoiar a Narf o domingo, e a aumentar as posibilidades de que Galiza acolla algún día a organización do Liet.