Vieiros

Vieiros de meu Perfil


Edición xeral

RSS de Edición xeral
XORNADAS DE ANÁLISE EN COMPOSTELA

Os retos da escola para turrar do medio rural

Tratar os problemas da educación no medio rural "desde unha perspectiva global" e ofrecerlle vías de solución "á marxinación educativa que aínda nos nosos días padece o alumnado do medio rural", son desafíos do encontro convocado por Nova Escola Galega. O lema das xornadas, que teñen lugar no Museo Pedagóxico de Galiza o 27 e 28 de outubro: "Medio rural galego, a necesidade dunha resposta educativa".

- 10:16 26/10/2006
Tags:

O encontro celébrase no Museo Pedagóxico de Galiza, Mupega.

Na primeira xornada, este venres 27, intervirá o antropólogo Xerardo Pereiro Pérez, do Departamento de Antropoloxía Aplicada da Universidade de Trás-os-Montes e Alto Douro, que falará baixo o título "A cultura rural: Entre a tradición e a modernidade". Deseguido, Santiago Prado Conde, do Departament d'Antropologia Social da Universitat Autónoma de Barcelona, dará a conferencia titulada "Poboacións non pertinentes nas institucións educativas: O alumnado con procedencia rural nun instituto galego". No peche do día, vaise presentar o libro A educación no rural en Galiza, coordinado pola Mesa Galega de Educación no Rural, de Nova Escola Galega.

Na segunda xornada asistirán representantes de até nove organizacións sindicais e colectivos e asociacións con presenza no rural, para explicar as súas propostas e visións sobre a situación. Ademais, preséntanse varias comunicacións vencelladas á educación e o mundo rural, por parte entre outros da Asociación Galega de Cooperativas Agrarias e Televinte de Chantada. Ademais, haberá unha rolda sobre o labor do goberno galego diante deses retos, onde estarán Carme Adán, secretaria xeral de Igualdade, Gonzalo Flores, director xeral de Investigación, Tecnoloxía e Formación Agroforestal, e Xosé Manuel Mouriz, subdirector xeral de centros da consellaría de Educación.


0/5 (0 votos)