Vieiros

Vieiros de meu Perfil


Máis Alá

Xestionado por Vieiros
RSS de Máis Alá
CATRO CICLOS EN DECEMBRO

Vento do oeste, vento do leste no CGAI

O mes de decembro vén cargado de novidades cinematográficas: o CGAI presenta varios ciclos para despedir o ano ben diferentes. Por unha parte, 'Ventos do Leste' tráenos os novos cinemas dos países socialistas europeos entre o 55 e o 75. Pola outra, veremos a segunda parte d'A xeración da violencia USA'. Ademais coñeceremos de preto a obra de Bruno Dumont, e aínda teremos algunha sorpresa no ciclo 'Fóra de serie'. O mes xa comezou potente, coa homenaxe a Llorenç Soler e a continuación do ciclo de cinema portugués, pero decembro aínda acaba de comezar...

- 13:42 04/12/2006
Tags:

'Fóra de serie' aglutina mostras do Festival de Cinema de Gijón, como Juventude em marcha (luns 11 ás oito), ou a continuación do ciclo de cinema portugués enmarcado na IV Mostra Portuguesa: O espelho mágico, de Manoel de Oliveira que poderemos ver o mércores 13 ás oito e media, e A costa dos murmúrios, un cru retrato do Mozambique colonizado elaborado por Margarita Cardoso, que será proxectado o sábado 16 ás seis.

Ademais, ao longo deste mes renderáselle homenaxe ao cineasta Bruno Dumont, coa proxección de catro dos seus filmes: La vie de Jesus, unha historia de rapaces desposuídos merecedora da Cámara de Ouro de Cannes (sábado 9), a dura L'humanité (venres 22), 29 palms, tamén nos límites da depravación e do máis baixo da condición humana (martes 12), e Flandres, Gran Premio do Xurado en Cannes este mesmo ano (luns 4), unha historia de amor no contexto das guerras contemporáneas. Todos estes filmes serán proxectados ás oito e media.

Violencia nos EUA, búsqueda na antiga URSS
Mais os pratos fortes do cinema son, sen dúbida, o remate do ciclo sobre a xeración de violencia nos Estados Unidos de América e o cinema dos países comunistas durante os tempos da bipolaridade. As dúas faces do mundo daquela. No marco do primeiro, veremos O home de Laramie de Anthony Mann (1950), unha historia de indios e vaqueiros pero con certa complexidade psicolóxica, interpretada por James Stewart. Será o xoves 7 ás oito e media. Tamén On dangerous ground, de Nicholas Ray (1955), na que Robert Ryan intepreta a un policía violento, o xoves 21 á mesma hora, e The narrow margin (1951), outro filme de gángsters da man de Richard Fleischer (o venres 22 ás seis).

En canto ao cinema do Leste, daquela comezaba a emerxer Polanski: a espectacular Coitelo na auga será proxectada o venres 15 ás oito e media. Este thriller psicolóxico sobre as contradicións do ser humano e as súas relacións foi o último de Polanski antes de se exiliar a Francia. Este impresionante filme foi candidato ao Óscar e premiado en Venecia. Tamén veremos Os amores dunha loira, de Milos Forman, unha historia de amor ambientada na Checoslovaquia escura que anticipaba a Primavera de Praga (1968), como peche do ciclo, o sábado 23 ás oito e media. O mesmo director realizou Ao lume, bombeiros!, unah sátira social que poderemos ver o sábado 14 ás oito e media. O filme que non puido rematar Sergeï Parajadnov por ser acusado de homosexual e preso, o poético A cor da granada, proxectarase o venres 15 ás seis. Ademais, unha fábula ambientada no mundo agrario ruso, O primeiro mestre, de Andrei Mikhalkov-Konchalovski, o sábado 23 ás seis; Érase un merlo cantor, de Otar Iosseliani, o mércores 20 ás oito e media; As margaridas,de Vera Chytilová, unha historia de duas mulleres nun mundo masculino (martes 19 ás oito e media); a convulsa Hungría dos 40 n'Os desesperados, de Miklós Jancsó (luns 18 ás oito e media); Salmo vermello, do mesmo director, retrata Hungría nos últimos días do século XIX, e valeulle o premio á mellor Dirección en Cannes (poderemos vela o martes 5 ás 20:30); o primeiro filme de Ivan Passer, Iluminación íntima (sábado 16 ás oito e media); e Pai, do húngaro Itsván Szabó, que mestura o recurso da infancia cos mitos políticos (sábado 9 ás seis).


Documentos

0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: