Vieiros

A tregua acordada na tarde do venres entre os líderes políticos de Hamás e Al Fatah non foi efectiva. Simpatizantes das dúas formacións protagonizaron na madrugada do sábado enfrontamentos violentos na Franxa de Gaza aínda que de momento se descoñece o número de vítimas. Na mañá do venres os ataques entre as faccións palestinas provocaron a morte de polo menos vinte e catro persoas e deixaron máis de douscentos feridos na Franxa. Pola tarde, líderes de Hamás anunciaban, baixo a atenta mirada de mediadores exipcios, que se chegara a un acordo de cesamento de fogo con Al Fatah. Porén o pacto para controlar as hostilidades foi ignorado polos simpatizantes das formacións. Os principais enfrontamentos vivíronse no Ministerio de Agricultura, na sede de Seguridade Nacional e nas universidades.