Vieiros

"As representación da Guerra Civil (1936-1939) e o franquismo na nova literatura galega" achegará a Bos Aires as voces da diáspora. Os lectores bonaerenses coñecerán de preto, como indica Andrea Cobas, "a violencia do Estado, a emigración, a resistencia, as mulleres, sostén da familia e a economía, e moitos outros temas que non son alleos aos arxentinos que vimos de lembrar os 30 anos do golpe de Estado de marzo de 1976".

A Nova Literatura Galega, ou o corpus que integran as novelas escritas dende os últimos 80 até hoxe, será abordada dende a perspectiva do revisionismo histórico. As achegas máis recentes sobre e guerra e o franquismo veñen da man de Suso de Toro, co seu Home sen nome, e d'Os libros arden mal, de Manuel Rivas. Tamén serán lidas Fábula, de Xavier Alcalá, Land Rover, de Suso de Toro e algúns contos do libro Arraianos, de Xosé Luís Méndez Ferrín. Tamén Agosto do 36, de Xosé Fernández Ferreiro, Amor de tango, de Queizán, No ventre do silencio, de Ferrín, Expediente Artieda, de Luís Rei Núñez, e Pensa nao, de Anxo Angueira Viturro.

A escolla do Tortoni non é casual, segundo explicou a xornalista e profesora Débora Campos: "hai algo mais de 70 anos era neste mesmo lugar onde os artistas, políticos e pensadores que a Guerra Civil e o franquismo expulsaron da súa terra atoparon neste precioso café un recuncho onde seguir polemizando, reflexionando, xerando ideas e proxectos".