Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
Valencia 0 - 1 Celta

Derrota inxusta para o Celta ante o Valencia

Un bo Celta mereceu moito máis na súa visita a Mestalla. Un golpe de fortuna deulle ao Valencia os tres puntos nun encontro en que os celestes levaron moito máis perigo cara a meta rival. Desta vez, as sensacións deixadas polos de Vázquez son máis que positivas, porén, a derrota os pode deixar ao final da xornada en postos de descenso outra vez.

Redacción - 22:00 03/03/2007
Morientes anotou o gol valencianista

Morientes anotou o gol valencianista

Un gol de Morientes nun espectacular remate decantou o encontro para os locais mediada a segunda parte. Até o momento, O Celta fora pouco a pouco facéndose co mando do encontro e incluso dispuxera de importantes ocasións que non atoparon porta.

As baixas de Iriney e Oubiña obrigaron a Vázquez a improvisar un dobre inédito formado por Pablo García e Tamas. Lonxe de facelo mal, a parella bloqueou o ataque do Valencia con acerto e deixou que Cannobio levase a batuta á hora de organizar o ataque.

Na primeira metade as ocasións repartíronse por igual, sendo as máis claras un disparo lonxano de Tamas e un rexeite que Angulo non soubo aproveitar ante Pinto. Nos segundos corenta e cinco minutos o Celta encerrou os levantinos na súa área e dispuxo de importantes ocasións nas botas de Nené e Baiano. Porén, coa entrada de Morientes e Joaquín no campo o Valencia recuperou a súa pegada en ataque e así chegou o seu gol. Con vinte minutos por diante, o Celta procurou á desesperada a igualada. Un acertado Cañizares a evitou nun par de ocasións e así chegouse ao final do encontro.

A derrota fai do próximo choque en Balaídos ante o Athletic unha auténtica final. Trátase dun dos candidatos a ocupar a terceira praza de descenso polo que sería de vital importancia non deixar escapar os tres puntos de Balaídos, unha volta despois.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: