Vieiros

Máis de 60.000 visitantes participarán na Brest 2008, "unha festa de mariñeiros, de cultura, de artesanía, de gastronomía, que se repite cada catro anos desde 1992 e que en cada edición ten un convidado de honra que este ano é Galiza", confirmou Peron.

O tenente alcalde de Brest destacou que xa houbo varias reunións de traballo coa Consellería de Cultura e Deporte e a Federación Galega pola Cultura Marítima e Fluvial e que tamén asistirá ao Encontro de Embarcacións Tradicionais de Galiza, que se celebrará en Ferrol en xullo de 2007.

Pola súa parte, o representante da Consellería de Cultura e Deporte, Xosé Antón Fernández Rojo, sinalou que "a Brest levaremos o mellor que temos, que é o noso patrimonio, que o temos que poñer en valor, o noso enorme potencial turístico, a nosa gastronomía, a nosa cultura.... En resumo, o que somos". Será en abril cando se presenten todas as actuacións que se van a levar a cabo con motivo da presenza de Galiza en Brest no ano 2008.

Ao mesmo tempo, o presidente da Federación Galega Pola Cultura Marítima e Fluvial, Fernando Piñeiro, agradeceulle á organización de Brest 2008 o convite e á Consellería de Cultura e Deporte o entusiasmo amosado neste proxecto desde o principio. "Para nós é moi importante, permitiranos levar a Brest o traballo que se está a facer dende hai moitos anos e de forma totalmente altruísta por parte de moitas asociacións para manter vivo o noso patrimonio marítimo".