Vieiros

Como único argumento en contra do proxecto desde o PPdeG referíronse este martes no Parlamento á súa convicción de que a iniciativa é unicamente unha teima do conselleiro de Traballo, o socialista Ricardo Varela, de lexislar "nun área xestionada fundamentalmente polo BNG".

A deputada do PPdeG Susana López Abella afirmou na Cámara que se trata dunha "lei pantalla" que só responde a "loitas internas do bipartito". López Abella preguntou tamén se a igualdade da muller "é interpretada pola Vicepresidencia do mesmo xeito que o fai o seu secretario xeral", en referencia á recente denuncia dunha antiga empregada doméstica do actual secretario xeral de Relacións Institucionais, Antón Losada, información feita pública pola publicación Libertad Digital e cualificada de falsa por Losada.

Na opinión do conselleiro de Traballo, os populares galegos rexeitaron apoiar un proxecto para o que en principio se agardaba o consenso porque anteriormente o PP negoulle no Senado o apoio á lei estatal de igualdade, que esta semana debe aprobar o Congreso. Varela laiouse de que o PPdeG mude posición dunha semana para a outra "perdendo unha oportunidade histórica". A nivel local por exemplo, a norma contaba xa co apoio explícito da Federación Galega de Municipios e Provincias, controlada polos populares.