Vieiros

O Concello de Ortigueira anunciou esta semana que convocará un concurso público para elixir as actuacións principais do seu festival folc. Así, calquera empresa, compañía ou particular poderá presentar a súa proposta de concertos para a edición do Ortigueira 2007, que este ano se celebrará o 6, 7 e 8 de xullo.

Os participantes deberán presentar entre catro e oito posíbeis carteis. A organización analizará as propostas en bloque e reservarase o dereito a modificar un grupo por día da proposta gañadora. Segundo informan desde a web do festival, as bandas deben entrar nos parámetros musicais do evento pero permitiranse outros estilos “sempre que se adapten á tradición do festival”.

O orzamento para deseñar a programación desta edición será de 130.000 euros, e incluirá ademais dos cachés, os desprazamentos, aloxamento, catering e equipos técnicos e de produción de artistas contratados. A organización valorará, ademais do aspecto económico, a calidade e transcendencia internacional dos intérpretes seleccionados así como a presentación de proxectos elaborados expresamente para Ortigueira.