Edición xeral
Primeiras condenas en Serbia polos crimes de guerra en Bosnia
Un tribunal de Belgrado condenou a catro paramilitares acusados de participar nos asasinatos masivos realizados en Srebenica en xullo de 1995.
Foi a matanza colectiva coñecida máis grave en Europa desde a 2ª Guerra Mundial. Forzas serbias, co xeneral Ratko Mladic á fronte, entraron na cidade de Srebenica, de maioría musulmana, onde se refuxiaran milleiros de persoas. Fronte á inacción dun equipo de cascos azuis das Nacións Unidas que tamén estaban no lugar, asasinaron a preto de dez mil persoas.
Catro dos paramilitares que presuntamente participaran na matanza foron agora xulgados e condenados en Serbia a penas que están entre os cinco e os vinte anos no cárcere. O xuízo comezara hai seis meses e eran acusados en concreto do asasinato de seis persoas, entre eles tres rapaces. Dúas ducias de testemuños escoitáronse no xulgado, relatando como executaran aos catro primeiros e logo de obrigalos a transportar os cadáveres dos compañeiros fusilaron os outros dous.
Trátase dun paso importante na resolución dos crimes de guerra cometidos por militares e paramilitares serbios. O proceso iniciouse en xuño de 2005, cando o Humanitarian Law Center, un colectivo serbio, entregoulle ao Tribunal Internacional para a Antiga Iugoslavia, un vídeo que recollía momentos dos asasinatos.
Comentarios (2)
Porén hai unha eiva: as condenas son febles de 5 anos -para os paramilitares que "observaron" a execución- a 25 anos -para os que efecturaron os disparos. O presidente serbio, Tádich, xa solicitou unha apelación da condena para aumentala.
E dito sexa: Bosnia-Hercegovina aínda non condenou a ningún bosniáco por crimes de guerra. Tanto Croacia como Serbia xa levaron a cabo varios xuízos relativos coa implicación de cidadáns desas repúblicas en masacres e matanzas de civís. Con todo, aínda queda moito por facer, especialmente de cara a opinión pública.
E por certo, isto coincide, temporalmente, cunha interesante polémica en Croacia. A partir do próximo curso, un dos libros de texto da materia de historia na educación secundaria croata (mellor dito, unha das edicións dos 3 libros de texto que a escola pode ter como libro de texto) cita por primeira vez que o exército croata cometeu crimes contra a poboación civil serbia en agosto do 95 durante e despois da operación Oluja (treboada) que conquistou a república da Krajna Serbia para a república. Loxicamente, a opinión pública está divididad, pero é o enésimo esforzo do goberno croata para canto antes acontezan as mudanzas, mellor. E todo isto co HDZ no goberno, é dicir, o partido de Tuđman, de dereitas e co que Croacia acadou a independencia.
Novo comentario
Se xa tes o teu nome en Vieiros, podes acceder dende aquí:
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto