Vieiros

"Somos un grupo de creativos sen ánimo de lucro, entre os que hai deseñadores de webs, realizadores de documentais e xornalistas que traballan por facer visíbeis os sistema de censura na internet, así como manter aberto o debate sobre esta cuestión".

Este é o obxectivo último dos responsábeis de greatfirewallofchina.org, unha web que permite coñecer en tempo real se unha páxina, calquera do mundo, está ou non censurada na China.

O plan chinés de control sobre a internet, o Proxecto Escudo Dourado, leva en funcionamento dende 2003 e conta cunhas 30.000 persoas traballando para identificar contidos considerados perigosos. Unha vez detectados, estes poñen en marcha todos os recursos necesarios -cada día máis sofisticados- para bloquear o acceso ás webs onde se aloxan.

Dende o Tíbet á BBC
Algúns dos sitios chineses máis perseguidos son os que fan referencia ao grupo relixioso ilegalizado Falun Gong, os que informan sobre abusos das autoridades, sobre o Tíbet, ou en defensa da independencia de Taiwán.

Mais, tamén ocorre con páxinas estranxeiras. É o caso de Amnistía Internacional ou a BBC. Na maioría dos casos o bloqueo non é permanente, senón que se produce en momentos puntuais.

Espionaxe industrial?
Ademais, dende diversos medios apuntan á posibilidade de que o Goberno chinés estea a usar o Proxecto Escudo Dourado non só para censurar e bloquear o acceso a determinados contidos, senón tamén como unha ferramenta para a espionaxe industrial.

Non sería a China o primeiro estado en facelo. De feito o país oriental está a desenvolver un sistema operativo propio, para non ter que usar Windows, da empresa estadounidense Microsoft, que está obrigada polo goberno do seu país a deixar unha porta de acceso aberta nas computadoras que o levan instalado.