Vieiros

Vieiros de meu Perfil


Edición xeral

RSS de Edición xeral
Mantense firme na súa postura

Sánchez Piñón: "O calendario escolar está publicado no DOG, e non experimentará cambios"

SInala que a actuación de Educación "é un exemplo" en materia de diálogo. Os sindicatos estatais sumáronse á convocatoria de protestas da CIG.

Redacción - 12:23 18/04/2007
Laura Sánchez Piñón

Laura Sánchez Piñón

A conselleira de Educación, Laura Sánchez Piñón, reiterou esta corta que non haberá cambios no calendario escolar, en resposta á petición dos sindicatos de retirar a xornada de tarde nos centros durante os meses de xuño e setembro. Neste senso, insistiu en que "xa está publicado" no Diario Oficial de Galicia (DOG) deste luns.

"Foron consultados os sindicatos e os pais", sinalou Sánchez Piñón, quen admitiu que se trata dunha decisión "que pode ter diferentes opinións". Ademais, asegurou que "todos os decretos están a saír co acordo do Consello Escolar", o que converte á Xunta, ao seu xuízo, "nun exemplo" de diálogo.

Pola súa parte, os sindicatos UXT, CCOO, ANPE e CSI-CSIF, sumáronse a CIG-Ensino, e anunciaron a convocatoria de mobilizacións de profesores de máis de 950 centros.

Redución da xornada en dúas horas

En canto á contratación de monitores para liberar a carga de traballo dos profesores de primaria, a conselleira lembrou a proposta de reducir en dúas horas semanais as xornadas dos docentes, ao tempo que pediu "non mesturar" o horario dos profesores co dos alumnos. Porén, Sánchez Piñón admitiu que a negociación "non está pechada".

A titular de Educación realizou estas declaracións minutos antes de inaugurar o V Congreso da Inspección Educativa de Galicia, onde se "porán ao día os retos" do sistema, como alcanzar o 85% de alumnos graduados na Educación Secundaria Obrigatoria (ESO), manter os estudos até os 16 anos e unha formación continua que favoreza as súas opcións no mercado laboral.

Sánchez Piñón concluíu que o traballo da Inspección Educativa "é fundamental, non só para saber o que está a pasar", senón que debe ter "un papel dinamizador" e ir así "un paso por diante". "Agora é un momento importante, é o momento do cambio", subliñou.


5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: