Vieiros

O presidente boliviano, Evo Morales, convidou aos membros da recentemente creada Unión de Nacións Sudamericanas (UNASUR) a adoptar unha moeda única. Segundo informan medios locais, a proposta contempla que esta divisa se denomine Pacha (terra, en quechua).

"A proposición nace logo de moitos debates; nós, mirando cara o futuro, propoñemos o nome de Pacha", manifestou Morales o sábado en Cochabamba, durante a inspección dalgúns terreos para a construción da sede do Parlamento sudamericano.

Ademais, indicou que Venezuela e outros países do bloque tamén teñen unha proposta de nome, mais hai consenso en que toda Sudamérica conte cunha soa moeda.

Banco do Sur
Neste senso, comentou que o Banco do Sur, impulsado dende Venezuela e outros países da zona, poderíase constituír no equivalente a un Banco Central Sudamericano para regulamentar a economía dos seus integrantes.

Morales insistiu na idea de que a recuperación dos recursos naturais para o dominio do Estado é o mellor xeito de que as nacións acaden o seu desenvolvemento económico.