Vieiros

O conselleiro de Industria, Fernando Blanco, explicou este martes que o seu departamento vaille dar prioridade a aquelas empresas que lle dean traballo aos operarios afectados polos peches das minas das Pontes e Meirama. Así llo explicou aos máis de trinta empresarios galegos que solicitaron axudas do Plan Miner. O programa europeo pretende revitalizar economicamente os dous municipios galegos afectados polo peche das minas: As Pontes e Cerceda.

Pola súa parte, os sindicatos CC.OO e UXT anunciaron a desconvocatoria dunha folga de 48 horas prevista esta semana para a mineiría de todo o Estado. As organizacións tiveron unha xuntanza co ministro de Industria, Joan Clos, e entenden que hai vontade para cumprir todos os puntos do chamado Plan do Carbón 2006-2012. Pola súa parte, a CIG, que protagonizou as mobilizacións das últimas semanas, desconfía e asegura que vai agardar acontecementos.