Vieiros

Vieiros de meu Perfil


Edición xeral

RSS de Edición xeral
Tras unha xuntanza esta terza en Madrid

Galeuscat e PSOE traballan xa na reforma do sistema de voto emigrante

Representantes de BNG, CIU e PNV reuníronse co Xosé Blanco para tratar tamén outros temas como a reforma do Senado e a renovación do Consello Xeral do Poder Xudicial.

Redacción - 17:29 24/04/2007
Xuntanza desta terza, na sede do PSOE en Madrid

Xuntanza desta terza, na sede do PSOE en Madrid

Segundo anunciou o senador e coordinador executivo do BNG, Francisco Jorquera, a organización Galeuscat iniciou esta terza unha liña de traballo en común co PSOE, que "agarda estender a outras forzas políticas como PP e IU", para reformar a Lei Electoral no que se refire ao voto emigrante.

Tras a xuntanza mantida co secretario de Organización do PSOE, Xosé Blanco, na sede deste partido en Madrid, os tres representantes de Galeuscat, Francisco Jorquera (BNG), Josune Ariztondo (PNV) e Carles Campuzano (CIU) explicaron os temas abordados: a reforma do Senado, a modificación da Lei Electoral no que respecta ao voto emigrante e a renovación dos membros do Consello Xeral do Poder Xudicial.

Segundo subliñaron, a intención de Galeuscat é a de "implicar a outras forzas políticas" e estender este tipo de xuntanzas a outros partidos políticos como PP e IU.

Compromiso do PSOE

Francisco Jorquera fixo especial referencia ao voto emigrante. "Hai un compromiso do PSOE de iniciar desde xa o traballo en común", sinalou, e engadiu que no vindeiro outono terá lugar unha nova reunión.

O BNG fixo patente os seus arelos por que "esta reforma se materialice canto antes". "De non ser posíbel antes da fin da lexislatura, tería que ser ao comezo da seguinte; o que non sería xustificábel é que no próximo mandato non estivese aprobada", sinalou o senador nacionalista.

"Só nas xerais, e con circunscrición propia"

"O BNG é partidario de que os emigrantes só voten nas eleccións xerais e teñan circunscrición propia", manifestou Jorquera.

"O CERA no noso país xa representa o 12% sobre o censo total, e xa hai concellos onde significa unha porcentaxe do 50%", declarou, e engadiu que "se pode chegar á situación de se contabilizar 500.000 inscritos, co paradoxo de que Galiza poida ter máis votantes ca residentes".

O senador do BNG urxiu sobre a necesidade de rematar cun sistema que permite as manipulacións do voto e non ofrece garantías democráticas. "Por riba, son votos que non contabilizan á hora do reparto de escanos no Congreso", sentenciou.


Ligazóns

4.5/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: