Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
II Bandeira Marcha Mundial das Mulleres

Traiñeiras contra a discriminación sexual

O Concello de Moaña acolle a segunda edición deste campionato, que reivindica a igualdade de oportunidades entre homes e mulleres no mundo do remo.

FAA - 11:57 02/05/2007
Este domingo dispútase a II Bandeira Marcha Mundial das Mulleres

Este domingo dispútase a II Bandeira Marcha Mundial das Mulleres

"Malia os obxectivos conseguidos neste último ano, segue a existir unha gran incomprensión por parte dos clubs de remo cara ás medidas que buscan estimular a participación feminina nos deportes de remo". Vitoria Iglesias, presidenta da Marcha Mundial das Mulleres -organización promotora da bandeira-, defende as políticas de discriminación positiva para motivar unha maior presenza das mulleres en deportes como as traiñeiras, traiñeiriñas e bateis.

Durante o último ano, grazas a loita das propias remeiras e dalgúns dirixentes e clubs de remo e co apoio da Marcha Mundial das Mulleres, do Servizo de Igualdade e da Dirección Xeral de Deportes da Xunta, conseguiuse o recoñecemento oficial das categorías femininas de bateis, traiñeiriñas e traiñeiras a nivel estatal (desta última, xa o había a nivel nacional), e a realización dos campionatos galegos de bateis e traiñeiriñas.

A pescada que morde a cola

"Antes, argumentábase que non se podían organizar campionatos oficiais debido a pouca participación feminina. É a pescada que morde a cola, unha cousa leva a outra. Realizando probas oficiais é o mellor xeito de que as mozas se apunten a este deporte", sinala Vitoria Iglesias.

Segundo esta, existen diferentes formas de pór en pé de igualdade o remo feminino e o masculino. Así, avoga pola creación de bandeiras específicas ou o pago de desprazamentos -como ocorre noutros deportes.

Ademais, dende a Marcha Mundial das Mulleres saliéntanse cal son as principais eivas que existen actualmente para acadar esta igualdade: menor número de mulleres remeiras, ausencia de mulleres na dirección, organización e xestión de clubs e Federación, menor difusión nos medios de comunicación, a consideración dos deportes femininos como non profesionais.

Bandeira de Moaña

O vindeiro domingo terá lugar en Meira, no Concello de Moaña, a II Bandeira de Traiñeiriñas Marcha Mundial das Mulleres, que organiza o Samertolameu de Remo. Polo momento sete clubs presentarán os seus equipos e, tendo en conta a boa aceptación da última edición, agárdase unha importante presenza de público.

Este xoves, ás 13.30 , será a presentación oficial do campionato na Casa do Concello de Moaña.


5/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: