Vieiros

Convocados por medio centenar de colectivos ecoloxistas e plataformas cidadás, os manifestantes partiron da Alameda de Santiago ás 12.15 horas para dirixirse á Praza da Quintana baixo o lema ‘Galicia non se vende. Terra viva e vida digna para tod@s’.

Ao remate da manifestación, que encheu de música as rúas de Santiago, leuse un comunicado no que se alertou sobre as consecuencias do “proceso destrutivo do patrimonio galego”.

Participaron na marcha numerosos representantes de plataformas veciñais de todo o país afectadas pola problemática urbanística. Destacada presenza tiveron as de Ferrol, que aproveitaron a concentración para denunciar a destrución da fraga de Menáncaro, aprobada no último pleno do concello.

En declaracións aos medios, membros dos colectivos convocantes comentaron que non descartan organizar futuras protestas para mostrar unha unidade cidadá co fin de preservar o medio galego.