Vieiros

Dúas iniciativas galegas contra a fenda dixital lograron un sitio nos premios diadeinternet da Asociación de Usuarios de Internet. Trátase de Tadega (Tecnoloxías de Atención á Diversidade na Educación Galega) e “Internet e as novas tecnoloxías coa discapacidade”, de Caixa Galicia.

Tadega é un rede de profesionais que traballan no ensino e con persoas discapacitadas, maiores e colectivos marxinados. O seu obxectivo é loitar contra as barreiras que dificultan que estas persoas usen as novas tecnoloxías. Nel participan persoal do CESGA, da ONCE e mestres de primaria e secundaria. Tadega aspira ao premio á web con mellor accesibilidade.

A iniciativa da Obra Social de Caixa Galicia forma no uso das novas tecnoloxías a enfermos mentais e persoas con discapacidade en Lugo e A Coruña. Foi seleccionada na categoría de “Iniciativa educativa”.

Onde votar
Agora os candidatos galegos teñen que agardar ata o 17 de maio, día no que se fallarán os galardóns nunha cerimonia en Málaga.

Para lograr o premio, deberán superar a outros nove candidatos. Gañará aquel que reciba máis votos dos internautas. Para votar por TADEGA e por Caixa Galicia abonda visitar o portal dos galardóns.