Vieiros

A Asemblea Xeral da ONU, no pleno do pasado 16 de maio, lanzou esta iniciativa co fin de promover a diversidade lingüística. Preténdese instar aos estados a que traballen pola conservación e a defensa das linguas, tanto as propias como as do resto do mundo. Por outra banda, demándaselle ao Secretariado que designe unha figura coordinadora para o multilingüismo e que garanta que os servizos lingüísticos dos estados da ONU conten cos mesmos recursos, referíndose ao dominio do inglés e menoscabo das outras cinco linguas oficiais das Nacións Unidas: árabe, castelán, francés, ruso e chinés.

Xa fixeron as súas achegas os representantes de varios estados: o de Andorra afirmou que "a protección das linguas é un dos piares fundamentais da diversidade cultural", mentres que o de Francia salientou "o dereito a usar a lingua propia, a capacidade de comunicar e, polo tanto, a comprender e facerse comprender, a preservación dunha herdanza de tantos séculos e mesmo milenaria, debe ser materia de primeira orde para as Nacións Unidas". Jean Marc de la Sabliere sinalou tamén que "en termos lingüísticos e culturais, e incluso de civilizacións, o multilingüismo equivale ao multilateralismo.

A idea de dedicarlles un ano enteiro ás linguas do mundo xurdiu hai cousa duns dous anos. O documento pídelle á UNESCO que se encargue de organizar as actividades conmemorativas para darlles visibilidade ás máis de seis mil linguas do mundo.