Vieiros

O BNG do Concello de Meis (O Salnés) decidiu analizar polo miúdo o censo de habitantes do municipio, logo de detectar unha serie de irregularidades que, segundo a candidata nacionalista á alcaldía, Mari Carme Martínez Rodino, "poden ser a punta dun iceberg".

Segundo o BNG, na casa do alcalde de Meis, o popular, Xosé Luís Pérez Estévez, está censado un empregado municipal e toda a súa familia. "Polo menos unha ducia de persoas" figuran como residentes na vivenda, segundo relatan os nacionalistas.

O segundo da lista, tamén
Para a candidata nacionalista, "é grave que dentro das bases de contratación no concello se estabeleza que haxa que estar así empadroado". A situación, que foi descuberta "por casualidade", segundo relatou Martínez Rodino, non queda aí, xa que os nacionalistas tamén descubriron que o segundo da candidatura do PPdeG nestas eleccións, o actual edil Uxío Fernández, ten censados no seu domicilio "un irmán do alcalde, a muller e os seus fillos".

Mari Carmen Martínez cualificou os dous casos de "sorprendentes e fóra do normal", e cre que non son os únicos que se puideron rexistrar no municipio. "Pareceunos incríbel esta situación e imos seguir investigando, porque sospeitamos que pode haber máis", insistiu.

Explicacións do alcalde
Pola súa banda, Xosé Luís Pérez recoñeceu que os dous casos denunciados polo BNG son reais, mais tamén quixo matizar que hai máis de dous anos que se realizaron estes dous empadroamentos. Neste senso, explicou que na súa casa ten empadroado ao técnico municipal porque se coñecían e reside alí.

Ademais, Xosé Luís Pérez comentou que a súa familia está censada na casa doutro edil "mais non están a residir nela, senón que viven en México e, por iso, non poden votar aquí". De feito, indicou que esta situación obedece a que a familia necesitaba dunha dirección na que recibir a súa correspondencia.